"Egemen Qazaqstan" respýblıkalyq gazeti" aksıonerlik qoǵamynyń Basqarma tóraǵasy, Halyqaralyq Túrki akademıasynyń prezıdenti, ǵalym, pýblısıs Darhan Qydyráli Aqparat jáne qoǵamdyq damý mınıstri qyzmetine taǵaıyndaldy.
"Memleket basshysynyń Jarlyǵymen Darhan Qýandyquly Qydyráli Qazaqstan Respýblıkasynyń Aqparat jáne qoǵamdyq damý mınıstri laýazymyna taǵaıyndaldy" delingen Aqordanyń baspasóz qyzmeti taratqan habarlamada.
Darhan Qýandyquly Qydyráli 1974 jylǵy 16 sáýirde qazirgi Túrkistan, burynǵy Ońtústik Qazaqstan oblysyna qarasty Túlkibas aýdanynda dúnıege kelgen. Ál-Farabı atyndaǵy QazUÝ-de (1991-1992 j) jáne Túrkıanyń Marmara (1992-1996 j), Dokýz Eılúl (1996-1997), Egeı (1997-1998 j), Ystambul (1998-2001 j) ýnıversıtetterinde bilim alǵan. Ystambul ýnıversıtetinde doktorlyq dısertasıa qorǵap, fılosofıa doktory ǵylymı dárejesin ıelengen (2001 j.). Abaı atyndaǵy QazUPÝ-da doktorlyq dısertasıa qorǵap, tarıh ǵylymdarynyń doktory atanǵan (2010 j).
Eńbek jolyn 2001 jyly Q.A.Iasaýı atyndaǵy Halyqaralyq qazaq-túrik ýnıversıtetinde aǵa ǵylymı qyzmetker bolyp bastaǵan. Munan soń oqý ornynyń qabyrǵasynda ǵalym-hatshy, kafedra meńgerýshisi, apparat jetekshisi, jetekshi ǵylymı qyzmetker sekildi qyzmetter atqarǵan.
2005-2006 jyldary – L.N.Gýmılev atyndaǵy Eýrazıa ulttyq ýnıversıtetinde dosent, aǵa ǵylymı qyzmetker.
2006-2007 jyldary – Qazaqstan Respýblıkasy Prezıdenttik mádenıet ortalyǵynda dırektordyń orynbasary.
2007-2008 jyldary – Qazaqstan Respýblıkasy Bilim jáne ǵylym mınıstrliginde Mınıstrdiń keńesshisi.
2008-2009 jyldary – Qazaqstan Respýblıkasy Prezıdenti Ákimshiliginde sarapshy, sektor meńgerýshisi retinde qyzmet atqarǵan.
2009-2012 jyldar arasynda Qazaqstan Respýblıkasy Prezıdenti Baspasóz hatshysynyń orynbasary bolǵan.
2012 -2014 jyldary Túrki keńesi Bas hatshysynyń orynbasary bolyp qyzmet atqardy.
2014 jyldan bastap Halyqaralyq túrki akademıasynyń prezıdenti.
2015 jylǵy 29 maýsymnan Túrki álemi Ulttyq ǵylym akademıalar odaǵy Hatshylyǵynyń basshysy qyzmetin qosa atqarady jáne atalǵan odaqtyń uıymdastyrýshysy bolyp sanalady. 2015 jyly IýNESKO-nyń Parıjdegi shtab-páterinde Qorqyt murasy jáne Túrki álemi atty halyqaralyq mádenı sharany, 2016 jyly Nú-Iork qalasyndaǵy Birikken Ulttar uıymynyń shtab-páterinde 2030 Jospary úshin Jibek joly boıyndaǵy jańa sınergıa atty halyqaralyq sımpozıýmdy uıymdastyrǵan.
2016 jyldyń shildesinen "Egemen Qazaqstan" respýblıkalyq gazeti" aksıonerlik qoǵamynyń Basqarma tóraǵasy bolyp keldi.
Ǵalymnyń kóptegen izdenisteri talaı kitapqa arqaý bolǵan. Atap aıtqanda, qalamgerdiń Mustafa Shoqaı (Ankara, 2001 j.), Taraz tarıhy (Taraz, 2005 j.), Túrik halyqtary ádebıeti tarıhy, (ujymdyq jınaq) (Túrkistan, 2005 j.), Mustafa Shoqaı (Astana, 2007 j.), Ulyq Túrkistan (Astana, 2008), Atymdy adam qoıǵan soń... (Astana, 2008 j.), Jeruıyq (Astana, 2009 j.), Mustafa (Astana, 2012 j.), "Máńgi tas", (Almaty 2015 j.) sekildi ǵylymı eńbekteri jaryq kórgen.
Darhan Qydyráli ǵylymnyń damýyna sińirgen eńbegi úshin Daryn memlekettik jastar syılyǵymen, Prezıdenttiń alǵys hatymen, Túrkologıa salasyndaǵy úzdik jetistikteri úshin Kúltegin atyndaǵy syılyqpen, Túrki álemine qyzmet syılyǵymen, Jańa Túrkıa Strategıalyq zertteýler ortalyǵy taǵaıyndaǵan Túrki tarıhy jáne mádenıetine qyzmet Altyn medalimen, Vengrıanyń "Ofıserlik kres" ordenimen, Ázerbaıjannyń Dostlýg ordenimen, Aqparat salasynyń úzdigi tósbelgisimen marapattalǵan.
Pikir qaldyrý